Komishon enkuesta HNO ta sigui ku interogashon djabièrnè i djasabra awor

For di interogashonnan ku a tuma lugá, a resultá ku Komishon enkuesta HNO tin interes pa interogá mas persona. Pa e motibu ei e komishon di Parlamento di Kòrsou ta sigui djabièrnè i djasabra awor ku e interogashonnan públiko. Esaki pa haña mihó bista riba desishonnan tuma durante konstrukshon di e hospital nobo na Otrobanda.

A skòrs e interogashonnan públiko djárason mèrdia despues ku e komishon a skucha bankero Leo Rigaud i mènedjer di transishon Gilbert Martina. Komishon enkuesta HNO, despues di a deliberá ku Rigaud, a dune aprobashon pa e enkuentro tuma lugá virtual. Ora e komishon papia ku un persona ku ta den eksterior, tin otro regla ta konta. Asin’ei e persona no mester hura, ni primintí. Esaki manera  ta para den e areglo di enkuesta. E areglo di enkuesta ta publiká riba e wèpsait https://kehno.parlamento.cw .

Promé ku a skòrs e interogashonnan djárason a anunsiá ken ta e próksimo testigunan. Djabièrnè 15 di mart 2024 lo interogá den sala di parlamento di Kòrsou dos persona. E skema pa e dia ei ta:                
1) 09.00 am Dito Garmers (konstrukshon di hospital)                  
2) 11.00 am Ashley Duits (asuntu médiko i futuro di hospital)
 

Por bolbe mira i skucha tur e 26 interogashonnan i kombersashonnan públiko ku ya a tuma lugá. Tur ta asesibel via e sistema di webcast riba wèpsait di Parlamento di Kòrsou https://www.parlamento.cw . Pa mas informashon tokante e Komishon enkuesta HNO bishitá https://kehno.parlamento.cw.

Durante e investigashon di komishon enkuesta HNO, kier tende opinion di públiko tambe. P’esei a introdusí un enkuesta públiko. E enkuesta públiko ta riba e wèpsait di komishon http://kehno.parlamento.cw. Asinei opinion di públiko tambe lo konta den e totalidat.