Bo opinion ta konta den investigashon di Komishon enkuesta HNO
Willemstad – Bos di pueblo tambe ta konta den e investigashon ku parlamento ta hasi riba e proseso pa yega na un hospital nobo. P’esei e Komishon enkuesta HNO ta tene dos seshon ku públiko djasabra 2 di desèmber.
E promé seshon ta pa esnan ku ta biba den area di Bándabou. E ta tuma lugá den sala multifunshonal na Barber i ta kuminsá 10’or di mainta. E otro seshon ta mèrdia den Sentro di bario Montaña i ta kuminsá 2’or. Kada un di e seshonnan ta dura un ora.
Ta invitá kada unu bini, sinti bo liber pa hasi pregunta i remarke. Ta ku plaka di nos tur a traha e hospital. Ta na e Komishon enkuesta HNO di parlamento di Kòrsou pa investigá hinter e proseso pa traha e hospital nobo.
E seshonnan ku komunidat riba 2 di desèmber, ta tambe pa splika komunidat kon e komishon ta bai traha. Ta bon pa sa tur e pasonan ku ta bai tuma. Komishon enkuesta HNO ta transparente i ta hasi e investigashon na bienestar di hinter komunidat. Bin sostené e komishon den nan trabou, paso esei ta bon pa futuro di Kòrsou.
